Dino最愛懷舊
「呢隻錶係朋友送嘅，喺瑞士製造，呢個牌子嘅錶同一般大牌子好唔同，佢最勁就係第一個發明計時器嘅公司，所以佢嘅手錶設計就沿用番計時器嘅外形，我覺得好特別。我最鍾意呢啲懷舊嘢，所以呢隻充滿懷舊feel嘅手錶就最啱我。」
李璨琛撞得炒得
「呢隻錶係我入行時第一隻買嘅錶，大概喺七、八年前，對呢隻錶好有感情，當時買都要二萬幾蚊，隻錶撞得之餘又防水，啲機件做得好好，戴咗咁多年都冇加快減慢，近年仲畀人炒到成三萬幾蚊，真係冇買錯。我自己都儲咗幾隻唔同牌子嘅錶，最貴嗰隻差不多四萬蚊。」
陳小春紀念之選
「呢隻錶係10周年Casablanca紀念版，好有紀念價值，不過隔咗一段時間之後，又出咗日曆版，早知當時等吓先啦，因為我戴手錶鍾意有日曆，感覺上型啲有款啲，又可以清楚啲知道時間同日子。不過我對錶冇乜特別要求，最緊要啱心水，無論電子上鏈都冇所謂，價錢唔一定貴，好似膠錶我都有㗎，因應唔同場合嚟戴囉。」
應昌佑復刻跳字
「我有一日行過旺角見到呢隻錶就即刻買，因為300幾蚊咁抵，呢隻款係八幾年嘅復刻版，係Casio其中一隻好經典款式。而且我本身好鍾意跳字膠錶，一來易襯衫，二來就算整花咗都唔會心痛。其實我自己好希望擁有一隻勞力士，不過到𠵱家仲未有心水。」
採訪、攝影：駱華齡、張俊銘、卓寶花、李珮洳、仇志德、陳順禎
