全球矚目電影《達文西密碼》雖然口碑參差，但卻是城中的熱話，而戲中的神秘鑰匙和珠寶原來由香港設計師張王幼倫設計，令她最近知名度大增。其實一度被稱為「嘉頓新抱」的她早已在海外揚名，作品數年前已登上蘇富比拍賣封面，又與「千禧之星」等巨鑽並列全球頂尖鑽石展。談到成功之道，謙稱人生似嚿雲的她表示堅持理想＋幸運是其成功密碼。 撰文：林妙萍
球隊的靈魂人物叫做keyman，張王幼倫（MichelleOng）卻名副其實是電影《達文西密碼》中的keywoman，她不是女主角，卻無心插柳，從全球珠寶商及設計師中突圍，設計《達》片打開一切謎團的密碼鑰匙，更包辦片中多件具影響力的珠寶道具，如TheCross別針、CircleCross別針等。
最難準時交貨
電影上映前後一個月，向來低調的張王幼倫備受注目，半個月來的受訪次數，超過平常一年的總和。她笑言已講到悶，但對於以港人身份參與國際電影感到開心，她說：「感覺都幾好，因為咁大製作，香港人都有份做，都幾威水啦，同埋見識到人哋外國製作幾認真，budget大到不得了。我去過三次片場，有一幕個博物館景用咗120幅畫，而雲石地同實木櫃全部係真嘅，唔係牆紙，唔係布景，簡單到一個廁所，都駁晒水喉，不過將來仲做唔做（電影道具），就睇情況啦。」
問張王幼倫為荷李活巨製操刀可有壓力？她說：「普通啦，最大係要限時完成，因為我做珠寶一向無deadline，只要做到最好，我都係做番自己一貫要求嘅標準。」張王幼倫由1985年開始學做鑽石批發，閒時創作首飾給自己，後來經不起身邊朋友要求，才半推半就入行，及後成立公司Carnet，去年更在中環開店。
張王幼倫直認自己的創業路順利得不得了，她說：「好好彩，我嘅人生一向都係一嚿雲咁，做乜都係個天安排。當初係玩玩吓，當發現嘅自己興趣，就心諗做到就做啦，估唔到又將hobby變成事業，我要感激我老公嘅支持，有佢養家，我可以無後顧之憂。」
自從張王幼倫嫁給嘉頓後人張力正醫生後，一直被傳媒起名為「嘉頓新抱」，做珠寶卻令她得回自己應有的身份，她對此說：「喺呢幾年，終於冇人再叫我『嘉頓新抱』，做咗咁多年、做咁多嘢先變得番自己，你哋話幾慘呀！」
懶理市場問題
不少珠寶品牌苦心經營，計算市場需求、潮流走向，找最hit的明星紅人做代言、拍廣告，張王幼倫從來不愛這套，只管堅持做自己喜歡的設計，她說：「啲人成日講market！market！market！經濟起跌對我都係一樣，我又唔了解人哋做乜，因為我唔係做大路嘢。我好老實，只係做自己嘅珠寶，只係做畀識欣賞嘅人，靚嘢永遠唔會過時，幾時睇都係一樣咁靚。」
張王幼倫對作品要求甚高，試過花半年設計一件首飾，但完工後，因未能達到心目中要求，她寧願拆件重做，她說：「人人都話我奄尖，我係奄尖，我過唔到自己對眼，可以點？好似戲裏面個別針，電影公司話求其用啲黑石就收貨，我唔得，近鏡見到晒喎，我都堅持用黑鑽石。」問她歷來最滿意的作品？她笑笑口說：「仲追求緊。」但她指去年設計的珠寶首飾，入選倫敦自然歷史博物館舉辦的「Diamonds」世界珠寶展，與「千禧之星」和皇室珍藏等一同展出，亦是創作生涯中的一個成就，她說：「全場得我一個有五件珠寶作品，其他大牌子都係一件起，兩件止。」
家庭勝過一切
《達文西密碼》令張王幼倫名下的Carnet在倫敦聲名大噪，HarveyNichols總店上月為她開了專櫃，請埋員工，做埋裝飾，只要求她交貨賣就OK。張王幼倫卻滿不在乎，本月底與丈夫飛英國探望子女，一享天倫樂，她說：「唔識sende-mail，平時同佢哋都係SMS，前幾日個仔打電話畀我，話見到巴士印咗條key嘅相，不知幾開心，我好掛住佢哋！」
