第一代「玉女掌門人」周慧敏，因為愛而復出開騷，為非牟利獸醫服務協會籌募經費，希望透過歌聲，喚起各界對協會的注意。原來曾表示不結婚、不生育的周慧敏年輕時也憧憬過結婚生子，直至遇上倪震，才感到不需倚靠一紙婚書去認同彼此關係。不過她表示若果意外懷孕，即使到50歲也會替倪震生下BB。 撰文：戴彩煥
現年38歲的第一代「玉女掌門人」周慧敏，當年在演藝事業如日方中之際，突然宣布退出，在別人眼裏，周慧敏也許很儍，但此刻的她，活得比任何人都幸福，因為她知足，她說：「有一個幾好嘅伴侶，有一班幾好嘅朋友，有一班好乖嘅小朋友（指貓貓狗狗），媽咪又錫我，連男友父母都好錫我，佢哋喺我心目中全部係一體，不分你我。我唔渴求物質上嘅嘢，如果突然間去咗，我都好知足，好無憾，對自己，我再無所求。」
艱苦的童年
相比起以前，現在的周慧敏的確活得幸福，她出生不久，父親心臟病發逝世，母親獨力撐起整頭家，約五、六歲時，母親得了重病，隨時有生命危險，讓周慧敏意識到自己隨時會成為孤兒。周慧敏說：「細個環境唔好，媽咪成日忙住返工，冇時間教我做人道理，但就教我唔好倚靠任何人，所以我從小性格倔強，明白冇任何人喺身邊，都要生活落去。好彩自己冇學壞，比一般小朋友善解人意，對物質也從來冇乜要求。」
唔排除結婚
原本周慧敏20來歲便打算結婚產子，但結識了倪震後，頃刻改觀，周慧敏說：「自己心態時時唔同，𠵱家呢個狀況幾舒服，同男友咁耐，已經漸入佳境，係收成期，唔使特登遷就，大家已識得為對方付出，畀對方幾大空間。好似佢寫稿，我會盡量靜啲，到我寫書，佢又會好靜，會令對方舒服，大家好識包容對方，既然去到一個咁可靠嘅階段，根本唔使一紙婚書去認同大家嘅地位。當然，我唔抗拒結婚，唔排除有日心血來潮想結婚都唔定。」
學倪匡處世
談到傳宗接代，周慧敏不諱言早已決定不生育，她說：「我鍾意小朋友，但對住佢哋我會吃力，會頭痛；但我對動物比較有把握，佢哋喺我愛護下，會好快樂；貓貓狗狗係我嘅小朋友，佢哋嘅地位唔比小朋友低，我將自己嘅愛畀佢哋，佢哋受惠到，自己已經好快樂。不過，如果意外有咗，我唔會唔要，就算50歲有咗，我都唔會唔要。」
周慧敏最慶幸的，是雙方家長也接受自己的另一半，跟男友父親倪匡相處，更是快樂無比的事，她說：「兩個老人家好獨立，思想開通，尤其是佢爹哋好風趣幽默，經常唔按常規諗嘢！好似佢今次返香港，追訪佢嘅傳媒唔比我哋少，但佢唔會唔習慣，見記者全程跟住佢，反正擺脫唔到，不如坐佢哋架採訪車四圍遊覽，將壓力變成另一回事。佢爹哋好豁達，係一個高人，佢呢套自己都用得着。人生存會面對好多變數，能唔能夠快樂，係自己可以控制到，用自己嘅智慧同生活體驗去化解同調節。」
攝影：葉君海
髮型：GeorgeShum(Hair)
場地：Joe'sBillards&Bar
