PacificCoffee由其士集團以天價買咗之後，經營風格冇變到，成為一啲人嘅吃早餐必到之地。左丁山辦公地方附近有一間PacificCoffee，朝朝見到一位貌似六十五歲以上嘅斯文長者，坐喺梳化嘆咖啡，一坐兩小時睇報紙，由《信報》、《明報》、《經濟日報》睇到《南華早報》、《虎報》，有時重見佢睇埋《IHT》、《華爾街》。呢杯咖啡真係抵到爛，好過去圖書館輪報紙睇。又一城嘅PacificCoffee地方夠大，據講日日都有幾張枱係城市大學學生佔用嚟溫書，討論功課嘅，可能坐喺度舒服過到大學Canteen啩！
呢日見到教授L坐在PacificCoffee睇notes，於是行入去與佢打招呼，佢話接受記者訪問前，溫習吓發言要點喎。講笑咩，教授L素來口若懸河，肥佬黎都請過佢做「佐丹奴」店舖服務顧問，平時又講慣書，畀記者訪問，使乜溫習定先？教授L話：「教慣書，係咁樣習慣㗎嘞！」
與教授L閒話，問佢觀察世事，最近有何心得；教授L話：「買樓唔好跟教授，我最近係咁意審察過自己啲同事、同行嘅買樓經驗，發覺教授買樓，係以用家心態出發，求空氣好，求清靜，求實用面積大。偏偏呢類樓唔適合炒樓投資人士嘅心態，所以教授買嘅樓，升值好少，升得慢時跌得快，想賣番出去，都唔容易。」乜嘢係投資家心態呢？教授L話：「配合當前潮流，一定要買大型屋邨，避開單幢樓，要有會所游泳池設施，知名度高，公共交通方便，所謂容易marketable是也！」呢類係大型中產屋邨噃，唔係所有教授都啱聽。教授L自嘆：「我識得講啫，買樓之時都係揀咗遠離市區嘅山莊，環境係好好呀，不過價錢幾年來都冇升過！」
教授唔識炒樓，一啲都唔奇，成日掛住炒樓嘅教授，點有時間做學問呀？事實上，教授人工不足以支持炒買七、八千蚊一呎嘅豪宅，有間安樂窩已經滿足咯，離開二千幾平方呎嘅大學宿舍，唯有將就吓，住番千零呎啦。
好多年前，中原地產大股東之一已經對左丁山講：「買樓要買強勢樓，唔好買冇設施嘅單幢樓。未買之前預先諗定放手賣番出去是否容易。」左丁山一路謹記，估唔到教授L亦有此觀察。