啲人話娛樂圈千奇百怪，其實社交界又何嘗唔係？話說社交界嘅腐皮同芥蘭，因為經常孖住出席大小派對，而被視為社交版Twins。早排腐皮見自己有啲走樣，所以去美國搵整容醫生修補吓，咁啱芥蘭亦都有事要去美國，腐皮就約老友喺美國見面。點知芥蘭去到酒店搵腐皮時，無論點拍門點叫佢，腐皮都唔畀芥蘭入房。原來腐皮今次做完手術後腫到成個豬頭咁，匿埋喺酒店房成個幾禮拜唔見人，女人真係愛靚唔愛命。