車婉婉鍾情綠色
「我平時好少買錶，因為好難買到鍾意嘅錶，買呢隻錶係因為錶面係綠色，我好鍾意呢個顏色，除咗三針之外，數目字係24小時，方便啲睇時間。我比較少戴飾物，錶係其中一款最好嘅飾物，有啲人鍾意用錶襯衫，但係我戴錶就只係為咗睇時間，通常會將隻錶校快十分鐘，咁咪永遠唔會遲到囉！」
葉佩雯最緊要大
「近排我個造型好Rock，多數都係黑色衫，加上好鍾意大隻男裝錶，見到呢隻錶嘅時候就覺得好啱、好鍾意。我係需要戴錶嘅人，如果唔係好不安㗎！我隻手要有重量先舒服，牌子就冇所謂，最緊要鍾意，隻錶仲一定要大隻，得條幼帶就唔啱我。如果有得揀，最好係皮帶啦！」
宣萱崇尚簡約
「其實我唔知道呢隻錶幾多錢，因為係錶行送畀我嘅！佢哋話有新款，仲送咗兩隻畀我，咁我咪開工戴囉。我覺得隻錶女仔戴都好靚，因為隻錶好清、好簡單，好易襯衫。我本身好鍾意啲比較簡單嘅嘢，同埋係鋼帶表，女仔戴起都幾型，感覺同皮帶唔同。」
Yumiko襯衫功能
「以我所知Breitling生產嘅求生錶同飛行錶都好出名，求生錶有發放求救訊號功能㗎。我對手錶嘅要求係錶面一定要夠大，顏色低調為主，我有番咁上下高，衣着簡便多，呢類型嘅手錶易襯衫。現時我大約有十隻錶，最貴嗰隻係勞力士Daytona，大約15萬，係最貴嘅，我鍾意咗好耐，所以儲錢買畀自己做生日禮物。」
採訪、攝影：魯萍、王連連、王崇穎、卓寶花、仇志德
