因子宮腫瘤復發而於7月做手術的陳松伶（松松），父親月前剛證實患上早期老年癡呆症，不久又發現患上牙周病，認真禍不單行。由於松松的父親行動不便，她稍後又要接受切除腫瘤手術，故日前便趁空檔帶老父到中環看牙醫。
陳松伶日前與一頭白髮的老父及女助手在中環出現，他們由友人接載前往皇后大道中下車，然後再步行到對面馬路的萬邦行。大概兩小時後，松松小心翼翼地攙扶父親離開大廈，未知是否陳父牙齒上還黏着東西，松松指一指他的牙齒，示意父親清理，然後便與助手登車離開。
體會健康重要
原來，松松當天是帶父親到萬邦行看牙醫，日前她在電話中說：「我爸爸最近有牙周病，佢行動唔方便，所以我趁有時間咪帶佢去睇牙醫囉！醫生話爸爸好多牙都唔得，要剝咗佢，但一次唔可以剝咁多，所以要分幾次嚟。」談到照顧年紀老邁的父親，松松顯得有點內疚說：「雖然舊年我同番爸爸媽媽住，但因為要做巡迴（音樂劇《雪狼湖》)，所以根本冇乜時間陪屋企人。呢排經歷咁多事，令我體會到家人同健康好緊要。」
交由律師處理
近日有報道指松松與Tomboy女助手在西貢豪宅過夜，她父母卻住荃灣工廠大廈，松松沒好氣的說：「西貢嗰度係我朋友屋企，荃灣嗰度係我父母做嘢嘅地方，我已經好清楚咁解釋畀嗰本雜誌嘅記者聽，但唔知點解我講同佢寫嘅嘢係兩回事。近期我已經為自己同爸爸嘅健康問題好困擾，本來唔想再理會呢啲報道，但我沉默唔係代表承認，原本諗住息事寧人，點知啲人一次又一次中傷我同家人，甚至連新加坡嗰邊都轉載呢啲失實報道，仲係好大篇幅報道嗰種，直接影響到我未來喺新加坡嘅工作，所以決定搵律師處理，保留追究權利。」
此外，松松又表示，其母有感早前購入的深井寓所地址曝光，以及經常受狗仔隊滋擾，打算着松松放盤，然後與她父親返回美國定居，好讓父親好好調理身體。
採訪、攝影：娛樂突發組
