泛海國際（129）現價仲喺1年超殘位上落，提供食大茶飯機會。泛海最新NAV0.8元，現價（0.295元）相對折讓67%，連埋手頭投資物業及過百萬方呎土儲增值，泛海NAV1蚊，等於現價3折買泛海。
又呢期大孖沙美林蒲頭，揸咗泛海5.09%，最近一次買入泛海，係呢個月9號，每股平均價講緊0.307元，而呢期泛海計劃發行嘅可換股票據，正股兌換價亦講緊0.305元。現價買泛海，平過票據換股價，亦分分鐘同美林平起平坐。
泛海股價長年牛皮，市場視為惡股，但要咁睇，有好似泛海咁平嘅同級地產股，十隻手指數晒，呢個亦可能係名牌基金落叠原因。港股大時代，與其要博，唔通揀隻P/B高到無倫嘅地產股嚟搞？買泛海，風險係股價繼續牛皮，損失機會成本，但若然嚟料，泛海股價可以係一個開、兩個開咁升法。
北海異動 昅昅無妨
北海集團（701）上星期股價成交見異動，昅昅無妨。北海過去幾年，將手頭非核心業務賣得就賣，應該冇乜多餘水份，資產質素變得相對實淨，最新NAV0.41元，現價（0.14元）相對折讓66%，有NAV墊底。
又睇番北海大股東名單，除咗大股東RGL手頭揸住北海22%，仲有莊士中國（298）12.7%及長實（001）5.2%。北海經過呢兩年清理業務，又有兩位現時仲係「靜態」投資者，究竟會唔會有新搞作？
錢雋