蘇施黃原名劉高琮，商台資深DJ，近日在有線娛樂台主持煮餸節目《活得很滋味》之「一粒鐘真人蘇」大受歡迎，亦在雜誌撰寫食經，家住加多利山，出入有司機接載，她直認生活奢華，並說：「唔知點解啲錢就使晒，因為我要食得好、住得好，所以做到隻狗咁。」
識玩識食
蘇施黃自小與書無緣，玩方面倒樣樣精，她說：「後生仔唔讀書唔緊要，但要做玩得叻嗰個，好似我咁，明明唔識賭馬，馬會請咗我講四年馬，唔識波，電訊盈科又請我去講世界盃，煮嘢我都係因為細個嗰時唔想讀書，走入廚房幫手，估唔到又派到用場，所以做人一定要有長處，唔好樣樣都麻麻哋。」
蘇施黃做DJ以不留情鬧聽眾兼cut線而聞名，所以聽她的節目很爽，但被她鬧的當然很不爽，訪問前一日，聽說蘇施黃指某報記者的提問幼稚，鬧到對方喊晒。蘇施黃說：「我一唔鍾意就即刻『媽』，人哋唔開心，我唔理得咁多，但我唔會唔解釋點解要鬧人，一定畀佢知道原因。」
攝影：陳偉權
場地提供：TowngasAvenue
後記：請人小廣告
蘇施黃拜託記者替她作出呼籲，希望可以早日請到工人，她說：「冇乜嘢特別要求，醒目就得，最好係泰傭，泰國人煮嘢食叻啲，切嘢都幼細啲。」離開前，她又鬼馬地拍拍記者肩膊說：「有感情問題就打畀我啦，我最鍾意叫人分手同埋離婚㗎。」