「生女唔使學，白頭到老就有排學」，呢兩句就係張學友結婚十年嘅肺腑之言。前晚柯受良（小黑）個女柯立珍同前任東華主席周振基個仔周博軒喺四季酒店擺35圍喜宴，好多圈中人包括張學友、曾志偉同劉家昌都有嚟飲，而台灣藝人吳宗憲同張清芳都專程飛嚟飲呢餐。
要扶持同體諒
睇住新娘大嘅張學友前晚單拖嚟飲，佢話都冇乜貼士可以教新人，佢話：「選擇結婚係一生嘅盟誓，講一句白頭到老就易，做起上嚟其實好難，我自己結咗婚十年，都係學咗十年啫。」記者笑佢女都生埋仲要學？學友就笑笑口話：「咁生女唔使學㗎嘛，總之兩個人要互相扶持同體諒啦，同埋keep住有愛呢份感覺囉，我自己真係好渣，唔多識𠱁老婆、冇厘情趣。」
