問蘇施黃是否lesbian（女同性戀者），她瞪大眼睛詫異地說：「唔係呀嘛？仲問？大家understood啦！」蘇施黃大談她的愛情觀，原來在她的心中，絕對不止有一座斷背山，她跨過一山又一山，是因為勤力，亦因為她要前進、前進再前進。 撰文：張止寒
現年51歲的蘇施黃，多年來一直作男性打扮，對於她的性取向亦有不少傳言，記者單刀直入問她可是女同志，她打了個突，隨即說：「你見我着到咁嘅樣，個頭剪到咁嘅樣，我由出道開始已經係咁嘅打扮，唔係吖嘛？仲使問！你見到一個人妖行出街，鬼五馬六咁，你仲走埋去問人係咪人妖？大家understood（明白）啦嘛，你又唔去問俞琤係咪攣？」
問蘇施黃現時是否一個人住，她即報以鬼馬表情說：「我梗係唔係lonelyboy啦，最好四個人一齊住啦，啱啱夠一枱麻雀呀嘛。」
「不能一刻冇愛情」
感情生活方面，蘇施黃透露她是一天不能沒有愛情的人，她說：「我唔可以一刻冇愛人，有啲朋友，一路以嚟都係一條友，其實咁樣係唔得嘅，習慣咗一個人，性格會愈嚟愈怪，好難相處；亦有啲朋友雖然有愛情，但係一人住一間屋，得閒你過嚟住吓，得閒我住吓你度，咁樣都唔係分享生活，係愛極有限。」
蘇施黃續說：「愛情投入好緊要，好似打份工咁，原來你老竇係李嘉誠，你只係賺錢買花戴啫，咁就唔會投入，冇咗份工唔得嘅就會投入。」
蘇施黃用勤力來形容自己的愛情態度，她說：「我嘅愛情經歷好豐富，從來都唔可以停低，做嘢要勤力，談情說愛亦要勤力，感情變淡，係因為慣性，takethingsforgranted（視作理所當然的事），我係一個幾浪漫嘅人，工作上係懶啲，但懶得嚟又做得夠喎，我嘅夠係比人好，我做咁多份工，各樣都唔太差，做唔到嘅嘢，我唔想做，但應承咗做就要做到最好，談情亦一樣。有啲情侶，一睇明知實散硬，但唔肯分手，拖吓拖吓十年八年，我唔要有一日係咁，做人朋友又好，情人又好，只要我覺得有唔開心，即刻會檢討，然後會好狠咁決定各奔前程，唔肯放手嗰啲，係跌入咗comfortzone（舒適的環境），驚轉會要適應好多嘢，但人係要前進嘅，日日要向前。嗰啲唔肯分開嘅人，係懶，咁點會有開心嘅人生。」
「唔認花心係撇脫」
遇上失戀，當然傷心，蘇施黃從不死纏爛打，她說：「無論係你飛人抑或人飛你，經過一段時間嘅相處，分開都係傷心嘅。喺心理學嚟講，開心嘅嘢唔一定留喺度，唔開心嘅嘢會留喺度好耐，可以係幾日、幾年甚至一世，你話幾得人驚。其實分手係好難講得出口嘅，佢出得口一定諗咗好耐，量過度過點樣最唔hurt先講，咁嘅情況仲哀乜鬼嘢呀哀！」記者指有些女仔得閒無事會將分手掛在口以作要脅，蘇施黃說：「咁就抵佢死啦，咪當罰吓佢囉，咁幼稚！20幾歲先會鍾意玩屎忽花，我都50歲啦。」
以蘇施黃的論調，似乎不相信愛情有一生一世，她說：「咁又唔係唔信，雖然有人話我係花心，但其實我係撇脫，要對方同我一樣咁勤力先得，大家都係咁上下步伐先得。我嘅人生觀，對所有嘢都係一條柱咁落嘅，無論係愛情、友情、事情都係一樣。」
問蘇施黃現時的感情關係是否穩定，她說：「點為之穩定呢？你講嘅係quantityoftime，有啲人結咗婚60年但互相眼超超，夜晚走去扑濕個老公兼剪佢條啫嘅，咁算唔算穩定？我講嘅係qualityoftime，無論嗰段愛情幾長幾短，但我會擺晒我所有嘅感情落去。」