雖然周慧敏闊別樂壇多年，但也略有留意樂壇動向，在芸芸新人當中，她比較欣賞側田、王菀之和組合Soler。
Soler唱和超夾
「Soler兩個把聲好夾，和得好好聽，二重唱好似bandsound，聽覺效果好好，初初見佢哋係睇MTV，外國人唱廣東歌，令人好好奇，好吸引人聽佢哋啲歌。」
側田早知有料
「第一次聽側田唱歌係倪震《絕情谷》嘅開場曲，覺得佢把聲好吸引，當時唔知佢係邊個，後來我問寫開場曲嘅雷頌德，佢話個男仔叫Justin，唔係artist，話我唔會識喎！跟住有次睇show，見有個和音坐埋出嚟，佢唱得好好，覺得如果佢做歌星嘅話一定掂。後來基仔（古巨基）開演唱會，佢又做和音，我問基仔佢係邊個，基仔話佢叫側田。側田？英文咪係Justin？原來一直我好欣賞嗰個就係佢！」
王菀之優雅脫俗
「我覺得王菀之好有個人風格，唔係人哋構思咗再執出嚟嗰種。睇見王菀之彈琴，令我諗起Danny（陳百強），唔係好popstar，同觀眾有個距離，但又好draw到人注意；佢喺台上好優雅，唔會着到好潮流嚟迎合觀眾，有時行過電視機，我會特登停低聽佢唱，平時好少會咁停低。加上佢係創作歌手，我覺得呢方面好緊要，連樂譜都唔識睇，我唔可以接受，幾堂都好，學一學，打好音樂根基。作為歌手，有音樂基礎係基本，自己又寫到歌又作埋詞，可以有更長線發展。」
