敢玩盡樂壇眾生惟獨詹瑞文！阿詹早排喺演藝學院綵排舞台劇「萬世歌王」，仲特別招待200名學生同記者去睇，雖然係綵排，但佢一啲都冇欺場㗎，一次過以唔同歌手嘅造型，兼做埋《殘酷一叮》嘅主持人，叮人又俾人叮，又唱又跳。
唱廣東歌爆粗
一向扮嘢功架十足嘅阿詹，今次扮咗好多位當紅歌手，包括「郭富明」、「陳冠Day」、「無恥」、「耕田」、「古巨希」同「洪祖兒」等，造型同唱功都十分抵死。
扮「陳冠Day」時，阿詹啲廣東話特登唱到唔鹹唔淡，更加爆粗講「好X講」。之後佢仲好認真剃晒腳毛，但係就滿面鬚根，着住條粉紅色裙仔扮「洪祖兒」。阿詹以一個阿婆造型「陳火金」唱《戀愛大過天》，佢話要落嚟搵番個失散咗幾十年嘅廣州姊妹，因為呢個姊妹曾經同佢一齊組成「Cutie」合唱團，而噚晚首場劉德華同林嘉欣都去捧場㖭。
