富豪劉鑾雄同呂麗君嘅三歲半囡囡喺港島區一間幼稚園讀書，上個禮拜二（16日）朝早近九點，大劉千金喺兩個外傭、兩個保鑣加埋司機，由五個大人湊返學。
保鑣哥哥警覺性好高，發現有記者，即刻叫司機將七人車直駛入校內空地，兩個保鑣先落車在旁戒備，其中一個外傭將小主人抱出車廂步入學校，全程囡囡都足不着地。
學費每年$17,550
小主人上課期間，兩個保鑣一啲都冇鬆懈，留守學校大門外足足三粒鐘。到中午十二點左右，七人車載住兩個外傭嚟接放學，兩個保鑣企喺車旁遮擋鏡頭，囡囡就由兩個外傭陪住步出學校上車離開。
劉鑾雄囡囡入讀嘅幼稚園喺豪宅區，學生多數搭靚車返學，相信個個屋企都有番咁上下。至於間學校每年學費17,550蚊左右，有家長話揀呢間學校主因貪佢環境優美，而且師資唔錯。
冇一條龍直升
另外，日前有家長來信向本報投訴，話大劉個女成績唔算好標青，有人就要求謝姓校長改成績，部份家長得悉事件後曾經寫信去校董會要求解釋，但石沉大海。謝姓校長接受本報查詢時就話事件處理緊，至於點處理呢？總之處理緊喎。
記者訪問咗幾位家長，佢哋都話唔知道校長俾人投訴，又話間幼稚園其實都冇同名校小、中學結龍，家長應該唔使咁緊張要向校方施壓更改成績喎。
Textby關仁
