颱風珍珠掠門而過，香港有驚無險，至驚險嘅只係有年青人不顧三號風球警告，係要在大浪灣跳落水玩滑浪，結果要勞動消防員救護，可怒亦可笑。每次打風都有一啲唔珍惜生命、盲目追求刺激，逞一時之快嘅人士到石澳或者大浪灣玩嘢，實在係浪費納稅人資源。消防員冒險搶救市民，佢哋嘅生命並無保證，如果救咗啲笨人而賠上自己性命，你話幾唔抵？不過救人乃消防員之天職，佢哋行為值得欽佩，但是不可完全被利用。咁嘞，以後凡係在掛上風球之後仍然不理警告，堅持落水玩嘢嘅，要付出救命費，譬如上述大浪灣之役，出動八、九個消防員，如果行動需時兩個鐘頭，九個人一共用咗十八小時，消防局應該開張單畀嗰位玩嘢青年！以每小時二千蚊計，收番佢三萬六千蚊，算係幫補番庫房。如因救人而導致消防員傷亡，嗰位青年要按專家估計嘅損失賠償。
賠唔起又點？申請佢破產，然後送佢入赤柱食皇家飯啦，睇法官點判而定。世界上有好多滑浪地方，去夏威夷可以玩到夠，何必一定要趁颱風襲港而跳落海，次次玩殘啲消防員吖！
星期三颱風過後，雨過天青，見到藍天白雲，咦，一場風雨，清洗咗香港上空嘅懸浮粒子喎。披圖好注意天氣污染，來電話：「啱啱睇完珠三角空氣污染散佈圖，原來佛山一帶最污染，今日香港上空好好吖。」好好原來都係假象，當日晨早打開電腦睇天文台網站，中環空氣污染指數係五十，屬高水平，銅鑼灣四十，旺角三十九，好過中環，而沙田空氣污染度係二十，屬低水平。披圖不禁喟然而嘆：「咁好天氣嘅日子，中環仍然污染，位於豪宅林立嘅中半山，吸啖空氣都唔健康。」
我哋日日在中環十二小時以上，吸入咁多污染空氣，個肺都唔知有冇事。唔怪得李業廣因呼吸不暢順而推辭公職，留番啲時間到佢間泰國布吉島「超級清幽」別墅欣賞吓青山翠綠以及碧波蕩漾好過。買唔起布吉島別墅，披圖叫左丁山跟佢去海南島買屋，風景一樣咁靚喎！