女人十大最尷尬情景，其中一樣肯定係撞衫，最怕大家着住同一件衫，驚人哋着得靚過自己嘛，女人撞衫真係想搵窿捐。
男人撞衫就平常啲，事關個個都恤衫西褲，反而撞呔就少見啲。但立法會噚日就出現咗呢個奇景，主角係周一嶽局長同自由黨嘅方剛，場地係立法會宴請行政長官嘅午宴。
本來八方都發現唔到有撞呔事件㗎，只係時裝觸覺特別敏銳嘅田少行過發現咗，當眾向傳媒「舉報」先知，真係要多謝佢。望真啲，果然係一式一樣，都係魚仔圖案，不過周局長嗰條係黃色、方剛嘅嬌艷啲，係粉紅色，兩位大男人真係心有靈犀，好鬼合拍。
最難得當事人對撞呔都不以為然，反而落落大方一齊影相留念，男人同女人真係唔同。周局長仲好鬼馬咁話，咁樣反映佢哋嘅太太揀老公時taste一樣，真係風趣。
傳真︰2623-9278
電郵︰[email protected]