我開始發覺到Chris同阿卓有個共通點，好鍾意用我部車嚟做話題，話我揀錯車、又話我喺石澳道阻住晒，昨日又話我用$200油來計耗油量係大錯特錯。成日擺我部車上枱，佢得罪咗你兩個咩？係，我部Corolla唔係甚麼驚世好車，但在這6年內行走超過18萬公里，未曾出現過大問題，至今還是精精神神，行得走得，最緊要係仲叫飛得（當然是合法車速）！
掉轉頭，阿卓你部車又好好咩？犯咗改車嘅大忌：亂咁嚟。先前部福特Ka壞完呢樣壞嗰樣，離合器漏油要整咗$4,700，最後劏車價只係$1,600。買歐洲車要識保養㗎，你嗰台OHV大食又無力，又懶醒咁換大胎軨、硬避震，推都唔郁呀，途經大帽山嗰陣，上斜踏盡油得30km/h，前面部垃圾車就走得愈來愈遠，後面部雙層巴士就追住車尾。大佬呀，條路行50km/h㗎，你咪又係阻人前進，亂咁改車，五十步笑一百步！不過我會聽你哋講，就係打爆缸油，再行到着燈先計耗油量，到時你就知我係「慳油王」。
記者：鄭達基