工聯會啱啱換屆，按慣例都會北上同各部門打打招呼。佢哋新一批近17人嘅領導層，下星期一就會喺中聯辦官員陪同下訪京，星期五至返香港，暫時都係話會傾吓兩地空氣污染問題、港珠澳大橋、西部通道同中港事宜。會唔會提及煲呔同特區管治？就話要睇情況而定喎。
作為香港堂堂一個極有影響力嘅愛國組織，訪京又點會受到冷待？所以喺見港澳辦同啲不同政策局官員之外，肯定都有機會獲領導人接見，八方記得佢哋04年換屆北上時，都有機會見到副主席曾慶紅，冇理由冇機會食過番尋味啩？
不過，會長棠哥堅稱至今都唔敢講實可唔可以見到領導人，但就好坦白咁話：希望有咁大見咁大。梗係啦，見嘅領導人愈大粒，就愈反映工聯會喺中央心目中嘅地位有幾咁重要。咁以工聯會喺香港有成三十幾萬會員，相信中央唔會待薄佢哋啩。
傳真︰2623-9278
電郵︰[email protected]