無綫新劇《賭場風雲》日前在墳場拍攝一場葬禮戲，由於烈日當空，故宣萱立即拿出防曬霜狂搽，她眼見楊怡同樣曬得辛苦，好心替對方搽手，但竟然擺了大烏龍，原來楊怡於劇中奉命曬黑。
宣萱、楊怡、郭少芸、歐陽震華（Bobby）和黃宗澤等日前於跑馬地墳場，拍攝無綫劇集《賭場風雲》一場外景戲，他們需穿黑衣出席葬禮，由於天氣酷熱，眾人熱到一身汗。幾位演員未埋位時，各有各忙，Bobby和黃宗澤不時用紙巾抹汗，而宣萱及楊怡則不停搽防曬及蚊怕水。
蚊叮周身痕
劇中楊怡飾演菲律賓華僑，需曬得一身古銅膚色，故當眾人未埋位拍攝均紛紛避太陽時，楊怡依然慢條斯理，穿上短裙的她還被四周的蚊蟲咬到周身痕。宣萱起初以為對方怕曬，好心從袋中拿出防曬油替楊怡搽手，楊怡初以為是蚊怕水，但當搽上手臂後才得知是防曬，即場大叫。身旁的宣萱即說：「乜你唔係要防曬咩？」最後宣萱才知擺了大烏龍。
Bobby唔怕曬
宣萱自言夏天拍外景必備蚊怕水及防曬霜，對於自己擺了大烏龍，她說：「我點知佢要乜嘢呀，曬到咁黑重要話曬黑，一陣等佢曬到左右唔同色就好好笑。」Bobby對於兩位女士不時左搽右搽，問到他會否湊熱鬧搽埋一份時，他說：「男仔好少用呢啲，我只係覺得好熱，今日唔係着成咁都冇咁熱。」
採訪、攝影：王崇穎
