懷疑有會考生用手機出貓嗰單case，考評局噚日終於公布調查結果，教統局局長李國章梗係忙到痹，但常秘羅范就遠離風眼，噚日下午茶時間，開開心心同食神韜韜一齊食嘢，心情靚絕，記者問佢有關考評局單嘢，佢只係笑住話「唔關我事我唔答」，同埋「好開心考評局調查得好好」。
點解羅范心情咁靚？原來佢有份諗出嚟、由明愛主辦嘅「日日有食神」中式廚藝訓練班，24位參與嘅15至20歲後生仔女噚日終於畢業喇，仲煮咗三道菜畀羅范同課程顧問韜韜試食，其中一道蛋白杏仁茶好養顏，羅太話梗係要飲多啲啦！
原來上個月有幾位訓練班嘅學生親身下廚整咗10道菜，到會去羅范屋企招呼佢班親朋好友，令羅范非常滿意，仲話下次要再幫襯㖭，呢班本來雙失嘅學廚仔，𠵱家真係前途無限啦。
傳真︰2623-9278
電郵︰[email protected]