做一份好嘅稿需要好多因素，外人睇可能覺得有張靚相、有篇好字、時間夠快已經夠晒Perfect，但其實背後係絕對需要時間、需要攝影師、編輯同Art嘅配合。記者需要充足時間準備，先有紮實豐富嘅內容，更會有精神工作減低出錯嘅機會。往往好多人嘅注意力都喜歡放喺張相上面，但一份有吸引力嘅稿，Art嘅一色、一位、一排都係整篇稿嘅命脈，稍有差池都會影響成篇稿嘅視覺效果。但人生往往事與願違，眼見日本雜誌永遠比香港吸引，資料充足、大相夠正、就連美術設計都一絲不苟，日本人認真嘅工作態度的確令我有點蒙羞。好似今期6月號《COOL》介紹255件新Tee嘅Feature入面，全個粉藍白地乾乾淨淨，Tee嘅分類Topic以粉藍暗字襯底，簡單但係正！此外仲有不少春夏新貨介紹，好似Rebirth、Whiz同Revolver等。隨書附送嘅膠圈指環更同12個日本潮牌Crossover，例如GDC、RECON、MACKDADDY等，每本送4隻，睇你抽中邊隻牌子喇！
