昨日港股開出後3分鐘，恒指又散110點，好友以為今回又要貼膠布（傷少少咁解）。去到尾，恒指反升46點。唔使太冇信心，全球股市已經跌到咁上下，隨時會有技術反彈。
本田C輪9730：昨日有隻C輪，雖然未能打入10大龍虎榜，但都排名11，升幅29%，就係本田C輪9730。
9730的確係同日本汽車股本田有關。隻輪行使價6680日圓，本田昨收7520日圓，所以隻輪屬於價內輪。隻輪用港元報價，每100份兌1股正股，淨係呢啲滙價同兌換比率，已經搞到人一頭煙，好彩有電腦代勞，得出溢價5.1%，槓桿率6.1倍（資料來自彭博）。睇數據，好似好正常，睇真啲，莫名其妙，隻輪本月25日到期，但昨日最後買賣。正股昨日跌80日圓（1.1%），隻輪反而急升29%。雖然揸隻輪最後可以攞番幾多錢係按正股呢幾日平均價計算，但都唔應該有人用5.1%溢價去買隻末日輪，隻輪又唔係槓桿率大到無倫。9730昨日成交金額27萬，乜嘢人買呢？係唔係有人錢太多？
本田係日本勁嘢，市值4800億港元以上，幾乎相等於長實（001）與和黃（013）市值加埋，喺東京有幾十隻窩輪掛牌。炒家要炒，都走去東京炒。本港掛牌嘅9730，等一般炒家買賣，盞嘥氣，掛牌半年，低位（0.20元）時最叻試過兩日每日有1.4球易手，成交金額唔夠買兩架本田汽車。再睇吓街貨，原來只得11萬份，佔發行量0.11%。
章盛