打開電腦，九萬幾個ForwardEmail，呢期最多人睇嘅睇怕都係短片《會考最痛》，食正𠵱家嘅會考檔期，多中學生睇吖嘛！講真，提起會考邊個唔驚，捱更抵夜死讀爛背嘅日子肯定無人想試多次，當各中學生避而不談捱過就算嘅時候，有人已經將呢段慘痛經歷拍成短片交功課，仲放埋上網公諸同好，唔夠一星期點擊率超過一萬，網友留言大表感同身受，仲有人話睇完感動到喊㖭。
記者、攝影：曾冠輝
自編自導自演
自編自導自演嘅阿K話：「我好幸運，順利過到會考呢關。」讀緊大學一年級嘅佢學期尾要拍片交功課，就以會考為題諷刺考評局同補習社殘害考生，替考生出口氣：「會考生有冤無路訴，希望呢條片可以幫到考生發洩，代表佢哋向社會提出不滿。」片中客串嘅媽咪又係邊個？「嗰個係我媽咪，佢都好支持我拍片，我希望呢條片可以畀埋家長睇，等家長明白會考有幾辛苦。」片中另一演員和仔最有同感：「舊年A-Level考得唔好，屋企人淨係一味識得話我無用，我阿哥仲話：『入唔到大學嘅人唔好同我講嘢！』搞到自己灰晒。」講得啱，每當同學同家長呻，家長梗回應一句：「做嘢仲辛苦呀！」或者畀條片家長睇，好過自己呻幾萬次。
網址： http://hkyoung.com/movie/view.wmv
第1位：《會考最痛》之老土篇
街訪
第2位：五角大樓911遇襲
美國政府早幾日公開911飛機撞擊五角大樓錄影片段，但坊間一直質疑撞擊嘅係導彈而唔係飛機，網上就有條片大力支持呢個講法，睇完真係唔知信邊個版本好。
網址： http://www.pentagonstrike.co.uk/pentagon_ch.htm#Main
第3位：中央圖書館激咀
網上經常流傳情侶喺公眾場所咿挹嘅偷拍短片，但估唔到今次肇事地點竟然係中央圖書館，男嘅飛擒大咬，女嘅欲拒還迎，簡直當周圍嘅人死嘅。
網址： http://www.youtube.com/watch?v=_zXarLUocSU
