美聯物業統計，今年以嚟整體住宅成交中，二手所佔比例高逾九成，一手同二手成交比例係1比14（見圖），遠高於97年嘅1比6.9。
不過，美聯都補充話，97年樓市表現同埋經濟基調同𠵱家好唔同，當年一手成交量約2.1萬宗，二手成交更高逾14.5萬宗，今年以嚟嘅一手成交量，只有1914宗，二手亦只得嗰26770宗。
二手樓成交比一手多13倍，係咪算誇張呢？
班地產商不斷話香港經濟好，樓市健康發展，但係又因為息口問題，唔敢貿貿然推盤，今年以嚟得3000幾個新盤單位推出市場，有1910宗成交已經好好彩。不過，即使夠膽推新盤，甚至用高價開盤，兼一系列推動炒風嘅付款方法，遇着啲大佬輩嘅，無端端劈價搞亂個市，搶你客之餘仲搞到你唔敢繼續推高售價，後市冇晒方向，加埋好多發展商心知肚明，但又唔敢講嘅不明朗因素，二手繼續主導成交，樓價持續橫行甚至向下，美其名係健康發展，實質上係大家都睇唔透前景。
電郵地址：[email protected]