小初話口未完，華彩控股（8161）單靠回購唔係辦法，隻股噚日早市彈過上去1.26元一陣，跟住沽盤又殺到，真係好嘅唔靈醜嘅靈。
結果昨日華彩再跌25.42％，收0.88元，成交股數增至4869.2萬股，金額5467.66萬元。
據講華彩昨日又回購多582.8萬股，買入價由0.88元至1.23元，睇嚟都係無補於事。
同樣話進軍大陸福利彩票業的御泰金融（555），走勢亦相近，昨日跌10.77％，收0.29元，莫非大陸彩票概念真係咁短癮？
經紀黃話，𠵱家外圍麻麻，港股大跌後，就連芬佬都變得審慎，況且中國銀行招股又抽走巨額資金，港股就算有好消息都難炒起。好似新濠（200）話起第三個賭場咁大件事，獲外資大行瑞信同花旗等睇好，但昨日股價一樣跌1.32％，收18.75元。
港股未調整完之前，中小型股份都係易跌難升，不如唞一唞好過。
慕容小初