點樣叫親疏有別？睇睇噚日立法會宴請煲呔嘅座位就知啦。煲呔嗰一枱，嚟嚟去去都得民建聯同自由黨呢啲親密夥伴有得陪座，民主黨有七個到，但竟然一個都無份坐主家席，你話係咪俾人邊緣化吖。查實個宴會只係抽籤座位，民主黨真係無得怨，怪就只怪人哋民建聯同富貴黨好好彩，連個天都畀個機會佢哋晒吓命，話畀人聽「受寵」係點嘅得戚樣。
盛傳煲呔極憎恨嘅公民黨，就真係一個都冇到，唔通見煲呔玩親疏有別咁鬼衰，佢哋玩番杯葛抗議？湯大狀大聲呼冤，話實情佢哋真係忘記咗有個咁嘅活動加上人人有約，先至六個議員齊齊缺席。
事實上嗰段時間泛民主派都開緊飯盒會，八方見到都有好多公民黨成員出席，證明佢哋真係無講大話，煲呔咪以為人哋好似佢自己咁小器，硬係要搵啲位激吓對方至得噃。
民主黨慣咗放飛機
馬丁話自己從來唔會因為被疏離而呷醋，事關佢哋從來都冇被愛錫過。而民主黨咁少人嚟，同親疏有別無關，自爆話約親黨友去佢屋企食飯，12個話嚟最終咪得9個現身，所以都慣咗佢哋放飛機，今次甩底亦好正常喎。
馬丁仲乘機幽煲呔一默，叫煲呔千祈唔好同佢說親，因自己同佢都有個仔未婚；如果向佢說親，只會碰到一鼻子灰。點解？咪係唔想上演斷背山之嘛。
其實噚日席間都係閒話家常居多，馬丁同肥龍講波，當然梗係炮轟吓近來嘅假波事件；田少就同煲呔講達文西，猛話睇唔明《達文西密碼》，狂插套戲唔知講乜，不過讚過本小說「故事性好強」嘅煲呔都冇回應。同黃仁龍同枱嘅陳鑑林就話，仁龍仔話最近工作好忙，見好多人，難怪日前喺答問大會上佢都成日閉目養神。
煲呔噚日一日走幾場，去完電台同立法會，之後又趕去濕地公園開幕，真係好勤力，怪唔得佢會責怪啲銀行界唔為QDII敲門啦。噚日佢又喺電台節目提到銀行界，話打波時好鬼緊張，無可能傾到生意；就算有沖涼換衫等傾偈時間，都唔可以深入傾到呢亭問題，咁真係好貶低銀行界能力啫。睇怕銀行界係時候都要整個反擊煲呔大聯盟，免佢哋再喺銀行界頭上動土，動不動就插佢哋兩嘢，阻住大家打波。
傳真︰2623-9278
電郵︰[email protected]