為咗前景着想，好多地產代理都會趁淡市充實吓自己，香港置業就做得團體化啲，由集團嘅培訓中心專員，到各區分行向員工實行到會式培訓，針對日常工作加以培訓測驗。
邊一行都好，想搵快錢都要講實力，而且收入同工作能力及經驗，亦往往成正比。一啲啱啱畢業冇耐嘅大學生，見工時已經開價三四萬銀，仲話咁嘅要求一啲都唔過份喎，真係唔知搵食艱難。
雖然𠵱家個市差咗，但係代理呢行仍然吸引唔少後生仔入行，好似早排勞工處搞招聘會，美聯亦有參加，仲有近500人即場應徵，當中近六成申請前線職位，有部份係高學歷人士，反應相當熱烈。
咁又係嘅，記得九十年代樓市火熱時期，就出現大把年薪過百萬嘅代理，好多仲係剛入社會做事㖭。舊年樓市暢旺嘅時候，亦都出現唔少呢啲例子。而咁多人想加入代理行，多少都反映年輕人對樓市仍然好有憧憬，而且仲係好想搵快錢，係咪同早前有調查話，唔少香港人都諗住可以愈快退休愈好，咁做代理就有得博提早上岸有關呢？