世界盃好快殺到，不同牌子的波鞋、波衫都作最後衝刺，推出一系列世界盃產品。身為體育用品大哥大的Nike當然都冇例外，一邊照顧世界盃Fans、另一方面亦要照顧就嚟25大壽的AirForce1系列。Nike今年為AF1開序，已經搞到成條街都係AF1，甚麼SpecialColour、特別版等等，可想而知下年度正式大壽一定High到無譜。5月13日，日本就正式推出咗白色蛇皮AF1復刻特別版，此鞋舊版曾炒至近5皮港紙天價，更加成為各大鞋舖的鎮店之寶！
記者：羅灝汶
攝影：陳偉強
5年來首次復刻
5年前蛇皮AF1只限日本本土發售，就連美國Nike總部都冇得賣！由於BAPE主腦Nigo同DragonAsh樂隊成員都着過呢款鞋，搞到當年喺日本閒閒哋炒到$49,000，超級勁貴！根據現時店舖報料，就算你𠵱家肯出10萬蚊，都無人肯賣畀你！
呢款白色蛇皮AF1於4月22日與AF1MidPremium以及CountForceLow一同發表，同樣只限日本推出。不過發表之後就令到業界人士對AF1重新注目，因為之前推出的AF1都只是新色或者世界盃別注，始終代表性都不足以蓋過首對玩「蛇皮」的AF1。
細睇先分到新舊版
今次Nike推出的復刻版早於2001年開始發售，一出旋即火速售罄，所以業界對今次復刻亦稱為「白蛇的復活」。整體來講，復刻後外形與當年「白蛇」分別不大，驟眼望落直頭分唔出，細睇先至分辨到最大差別是腳踝部份的厚度和形狀與舊版有較大出入。最易令到大家感覺差別的地方就是01年推出的原著版只是印上蛇皮圖案，而今次復刻版的皮革經過改良後帶點粗獷感覺，摸上手即能感受到真正蛇皮的震撼感。其實計筆者話，新版就比舊版手工更精細喇，不過原創感覺始終強烈，就算你畀得起錢想買舊版，都未必有人肯睬你。
NB×潮店推新型號
今個月NewBalance連續推出多款日本別注版新鞋，當中就與日本知名鞋店、最鍾意同街牌交叉合作別注限量版的MITASNEAKERS聯手，再搭上第3者潮牌推出全新NBModel，分別為M554M同CM670。先講吓新ModelM554M，呢款鞋驟眼睇同普通NB設計冇分別，但原來佢係同MITASNEAKERS及WHIZ搞嘅Crossover。眾所周知WHIZ係日本人氣潮牌，當年在原宿寄賣自家設計並在全無傳媒催谷的情況下火速沽清而起家，今次與NB聯手仲要推出全新型號，真係唔講得笑。
除此之外，今勻NB同MITASNEAKERS亦與realmadHECTIC及STUSSY推出新型號CM670，採用標準ColourTone，望落同M1300有幾分相似。品牌的Logo做成鞋墊，成為一大特色設計，絕對係冧爆Fans鞋款。
ZABOOL（23116988）
尖沙嘴寶勒巷1號玫瑰大廈1樓B室