周杰倫自從同女友侯佩岑公開戀情後，雙雙人氣下滑，除咗周杰倫冇歌入圍今屆台灣金曲獎外，女友都冇份做金曲獎司儀。周杰倫噚日喺台灣出席中華音樂人交流協會頒獎典禮時，佢更加反口唔認同侯佩岑拍拖，唔知侯佩岑知道後會唔會好心噏，睇嚟佢兩個分手傳聞有迹可尋。
打阿妹力宏主意
問到周杰倫喺內地拍戲，點樣維繫同女友感情，佢話：「我現在不需要感情，只注重音樂和電影。從沒說在一起過，我不需要特別反駁，也不會澄清，隨便你們寫啦！」至於同超級女聲李宇春嘅緋聞？周杰倫話：「這是我出道以來最好笑的緋聞對象。」
據知，周杰倫當日追求侯佩岑時，曾經大膽上門搵侯佩岑經理人要求成全，但事後周杰倫例牌否認。對於分手傳聞，侯佩岑經理人噚日回應：「藝人私人感情沒有甚麼好回應，但侯佩岑近來仍工作賣力，笑口常開，並無異狀。」
此外，台灣金曲獎今年冇咗周侯呢對情侶撐場，主辦單位就改為邀請蔡依林做演出嘉賓，同埋又打前緋聞男女王力宏同張惠妹（阿妹）主意，東風節目總監侯文燕否認借佢哋炒作，佢話：「兩人都是好的音樂人，有資格也應該出席，再說歌迷希望看到的音樂人我們都會盡力找。」
