某日巡信和，上到2樓見到張《密殺戰群2》海報，第一眼即被那震撼草稿畫風吸引，一廂情願以為一定出自日本漫畫家手筆；出信和，見書報攤最新一期《新少年》，封面大大隻字寫着《密殺戰群2》將有「2p彩頁專欄+42p特厚連載」；回家八卦上網，居然見到有網友留言話等《密殺戰群2》等到頸都長；訪問作者，方知馮展鵬是個與我同齡的24歲香港小子，還勁到可用左右手畫漫畫，誰敢說港仔畫不出袋裝漫畫？
記者：羅灝汶
攝影：陳偉強
小檔案
馮展鵬今年只得24歲，綽號F.c.p、鵬仔，18歲憑《OnlyOne》成名，獲「第十屆東立新人獎」少年組第2名，2002年發表《密殺戰群1》，並於台灣《寶島少年》周刊連載，期間繪畫《獵殺天讎》小說插圖，2003年8月《密殺戰群》單行本於香港、台灣同步推出，備受漫畫迷追捧。
獨愛草稿畫風
首次與馮展鵬見面，難以想像他和我同年，24歲的他擁有高超畫技的「雙手」，大家沒聽錯，的確是「雙手」！他不是左撇子，但無聊貪玩過手癮，竟練成左右手都能作畫的絕技。他偏愛粗線條的草稿畫風，喜歡無限制的作畫風格，無師自通練成「雙手」好畫工：「我從小就鍾意睇漫畫，中學時期最鍾意《幽遊白書》，其實《幽遊白書》開頭都唔係用草稿畫，後期慢慢用草稿畫，我就愈嚟愈鍾意嘞。另外，沙村廣明嘅畫風影響我最深，因為我非常偏愛草稿畫，沙村就係我最大嘅啟蒙老師，當然我好希望可以慢慢擺脫佢的風格，有自己獨特畫風同技巧。」
（記：記者鵬：馮展鵬）
記：點解成為漫畫家？
鵬：自細好鍾意睇漫畫，我自己無正式跟邊個邊個學畫，初時畫漫畫只不過係興趣，好業餘性質，後尾得咗獎咯，咪全職做漫畫家囉。
記：作品點解叫《密殺戰群》？
鵬：呢個作品嘅英文書名係由《火鳳燎原》作者陳某大哥構思出嚟嘅，佢將女主角CAT嘅頭3個字母，分拆成ConfidentialAssassinationTroop，直譯就係「秘密暗殺戰鬥部隊」，再簡化成𠵱家嘅中文書名《密殺戰群》。
記：最影響你嘅漫畫家有邊幾位？
鵬：富樫義博、大友克洋、沙村廣明等等。
記：《密殺戰群》講間諜故事，有幾幕好似遊戲《METALGEAR》，有無俾遊戲影響創作？
鵬：我都好鍾意《METALGEAR》，不過我作畫前都無玩過《METALGEAR》，估唔到畫完之後有幾幕真係幾似，反而之後嘅故事有少少向呢隻Game取經。
記：《密殺戰群》有好多打鬥場面，望落唔似王小虎式嘅誇張對攻，畫得好寫實吓，你玩過搏擊？
鵬：我完全唔識搏擊，不過就好鍾意參考一啲技擊片段從中偷師，不過我都喜歡將幻想加入打鬥場面，天馬行空都唔錯。
陳某：佢好懶！
漫畫家陳某評《密殺戰群》：「鵬仔嘅分鏡係我見過台灣同香港兩地最好嘅，甚至超越大部份日本漫畫家，佢仲要20出頭咋喎，不過佢實在太懶喇。」3年前陳某已對鵬仔畫工讚不絕口，只批評他太懶惰，其實鵬仔有苦自知：「一來，我係個完美主義者，太執着自己嘅作品，故事我放第一位，其次考慮分鏡，一個分鏡往往要畫好多次先滿意，所以畫得好慢；二來，我係個病壞，呢兩年經常出出入入醫院，身體差，拖慢咗創作時間。」
2003年《密殺戰群1》單行本
講述世界一直醞釀着第三次世界大戰，只是各國仍然未部署好而已，在這段時間各國發動資訊戰爭，爭取敵國資訊作為戰爭用途，而特工和暗殺者就是這場戰爭的戰鬥工具，他們有不同的戰鬥力，而各國之間的陰謀就集中在他們身上。
2006年《新少年》新連載《密殺戰群2》
《密殺戰群2》由第9回開始至第17回完結，故事承接單行本，故事舞台在莫斯科，女特工「貓」（CAT）與俄國特殊部隊「BEAR」激鬥身受重傷，得到一位青年畫家所救，休養期間欲脫離戰爭成為平凡人，不過前路有更大的危險要她面對。
漫畫迷網上心聲
香港討論區yoiam留言：「一路唔知係香港人畫，……點解可以畫半（本）漫畫畫兩年有多！……」yoiam表示近期才翻看《密殺戰群1》，希望馮展鵬可以畫得快點，「……唔好要我等。」
（ http://www4.discuss.com.hk/viewthread.php?
tid=1546790&extra=page%3D1）
Uwants討論區skkkyyy留言：「……希望作者兩年後嘅大作可以更有進步，而且有第3集一定要早d（啲）出……等到頸都長。」
（ http://forum.uwants.com/viewthread.php?
tid=2188253&extra=page%3D1）
