華基光電（155）上周五搞投資者推介會，當日股價炒上1.03元，成交逾億元。不過，投資者對公司的太陽能發電設備業務反應一般，而引入策略投資者一事又冇晒下文，搞到股價連日下跌，噚日更出現小規模洗倉，股價一度大跌27.3%至0.56元，其後有心人入市力撐，收0.69元，跌幅收窄至10.4%。據聞華基光電仲有嘢搞，可能因此要力頂。
華脈無線（499）又傳廣東電信會借殼上市，雖然公司已表示不明升因，但股價照升27%至0.071元。其實呢個傳聞久唔久就會出現，但跟住炒兩吓就有人出貨，幕後人士咁玩法，好難搵人同佢哋玩，
港股噚日回穩，國壽（2628）創新高至13.05元，收報12.85元，升2.4%。有傳聞話股神正在增持，亦有傳聞國壽想抽水，所以踢高股價。芬佬朋友話，新地（016）配股你要驚，但國壽配股唔使驚，因為壽險股一向都係退休基金增持的對象，股份好易歸邊，除非發生重大醜聞或出現大撥備導致公司有倒閉危機，否則呢類賺梗錢的壽險股，一般都易升難跌。
德銀唱淡晶門
德銀睇淡晶門（2878）叫客沽貨，目標價降至2.70元，搞到晶門逆市跌4.84%至2.95元。據聞晶門上半年業務可能唔太理想，毛利率有下降壓力。
i師傅話，此股由3.975元高位回至2.95元，累積跌幅達到26%，唔少投資者都要出貨止蝕，後市沽壓可能會增加。
阿虎