商場冇永遠敵人，自從小小超李澤楷喺93年賣咗衛星電視（現為星空傳媒）畀傳媒大亨梅鐸後，大家嘅發展愈嚟愈遠。前者搞科技同電訊，後者專注做內容頻道。不過，世事冇絕對，小小超一直對傳媒業情有獨鍾，𠵱家now寬頻電視亦有聲有色；至於星空傳媒本來專注賣內容畀區內收費電視經營商，喺香港同有線合作。
咁自從now開台之後，兩間公司就愈行愈埋，首先now為咗加強本身內容吸引力，搶咗星空傳媒過嚟，以獨家形式播放佢哋嘅節目，最近佢哋仲話會一齊拓展亞洲區嘅寬頻收費電視市場。
事關電盈now寬頻電視用戶短短數年吸納到逾55萬客戶，成功為電訊公司拓開一條新路，令到好多海外電訊營運商都有興趣效法。
所以佢哋就透過全資附屬公司「萃鋒」為海外電訊公司提供技術及網絡基建服務，但若無內容有基建都冇用，現時拍住星空傳媒一齊做，由後者提供內容，咁就可以一條龍。照咁睇，日後再進一步合作都唔奇。