隔晚美股低收，杜指散214點。係人都估中，昨日亞太區股市冇個掂。日股跌過393點，埋單跌220點。恒指跌過438點，埋單跌349點。港股每5隻股票下跌，都有1隻上升，市場唔見有恐慌性拋售，夠膽喺低位撈C輪嘅，唔少到收市已經坐緊8%利潤。滙控（005）與中移動（941），市值夾埋縮咗543億元，總共拖低恒指169點，佔咗恒指總跌幅近1半。
中石油C輪4612：中石油（857）跌0.35元，收8.75元。中石油周二最低曾見8.50元，吼住再回到呢個位，撈C輪博反彈。15%以上溢價嘅C輪，搞唔過，等班自己友玩拋波仔遊戲算數。要落場，一定要揀低溢價嗰啲，萬一撞板睇錯，都唔使傷得太重。諗隻4612，8月中到期，輪價87仙，溢價5.7%，槓桿率10.1倍（有效6.5倍），引伸波幅37.6%，理想買入價係75仙以下。
中信C輪3525：紅色或紫色（紅加藍變成紫）背景嘅恒指成份股，跌得較重，例如中信泰富（267），跌0.60元，收23.55元，由上月19日見頂28.70元碌落嚟，唔見5個大餅有多。博中信反彈，買C輪3525。隻輪8月初夠鐘，輪價22.3仙，溢價2.4%，槓桿率10.6倍（有效8.1倍），引伸波幅25.2%，數據至正係佢。
章盛