前日大市彈完200幾點，昨日又受美股影響，最多跌過400點，真係心血少啲都頂唔順，最陰功係新鴻基公司（086）配完股昨日復牌，即時跌破批股價，場面異常慘烈。
新鴻基公司今次以每股7元配股，但一復牌就已經跌落7元樓下，最低見過6.50元，收市報6.75元，跌幅達12.96％，連帶阿媽聯合集團（373）同埋聯合地產（056）都受牽連。
除新鴻基跌得仲外，彩票股華彩控股（8161）跌得重勁，公司喺1月話打算以2億銀收購一間英國博彩系統和軟件解決方案供應商，但家陣又話唔買，另外傾過合作方式。由於華彩股價積弱多時，呢單消息即時嚇親芬佬，令股價急跌28.92％，收1.18元。
華彩即時作出回購389.2萬股，由最低的1.17元買至1.63元，但作用唔大。小初心諗，畢竟大陸彩票生意現時仍然係概念，除非有實際成績交出，否則公司單靠回購支持股價，並唔係長遠辦法。
慕容小初