電影《達文西密碼》於全球注視下昨日在港上映，這套改編自小說家丹布朗（DanBrown）同名作品的荷李活巨片，由於內容涉及耶穌與抹大拉的瑪利亞（MaryMagdalene）結婚並且有後，引起世界各地教徒不滿。爭議性愈大，愈引人入勝，但看過《達》片的觀眾都劣評居多，該片前晚在中環IFC舉行首映禮，不少藝人看戲後對《達》片都是貶多於褒。 採訪：比華利、梁錦文、林妙萍
徐子淇：男友做說書
本小說我仲未睇晒，所以睇戲時就一邊睇一邊問男友（李家誠），因為佢睇晒，清楚啲，可以解釋畀我聽。我覺得將本書濃縮成兩個半鐘頭嘅電影，雖然會刪除咗好多部份，內容會亂咗少少，但我仍然覺得套戲好有創意。我唔係教徒，所以對於套戲話耶穌係結咗婚同有後裔冇乜意見。我好欣賞男主角湯漢斯（TomHanks）出色演技，同埋扮修士嘅保羅班特尼（PaulBettany），佢作惡時真係好嚇人，我都好驚。
李彩華：揭秘甚吸引
作為非教徒嘅我覺得幾好睇，我好鍾意故事有揭秘成份，引人入勝。男主角湯漢斯同女主角柯德莉塔圖（AudreyTautou），雖然分別係美國人同法國人，但都好襯，尤其柯德莉塔圖嘅性格奸少少，佢演得好有味道。全套戲演得最出位係扮修士嘅保羅班特尼，佢為咗協助主教達成使命，不惜殺人放火。齣戲喺羅浮宮實景拍攝，睇完即刻想去。
馬德鐘：消化有難度
我唔係教徒，亦冇睇過原著，對於套戲所講嘅教條同宗教內容都唔係好明白，只係可以當故事嚟睇。套戲成兩個半鐘，內容又太豐富，一下子好難消化，所以我覺得麻麻哋。湯漢斯雖然係主角，但係佢好似冇乜戲做，好多場口都發揮唔到。
利嘉兒：欠幻想空間
我冇宗教信仰，原著嘅內容好仔細，但電影好多細節都解釋得唔清楚，冇睇過書好難明。本來尚連奴（JeanLeno）呢個警長角色都幾重要，不過套戲佢變咗茄喱啡，而伊恩麥加倫（IanMackellen）嘅爵士角色都係關鍵，但戲又交代唔到。我唔係咁鍾意電影嘅結局，太肯定耶穌有後，反而本書結局係個謎，畀到讀者幻想空間。
楊愛瑾：中段有悶場
我嫌套戲中段有啲悶場，可能我睇緊本書，對佢好大期望。湯漢斯表現中規中矩，而女主角柯德莉塔圖嘅演出就同佢之前套《天使愛美麗》（Amelie）好唔同，佢好似脫胎換骨咁，演技同打扮都成熟咗，其他演員表現都好平均。
葉梁美蘭：開頭好殘暴
我有睇原著，如果冇睇過原著就睇套戲，會好混淆，因為兩個半鐘內要交代太多嘢。套戲開頭好殘暴，但到中段愈嚟愈好睇，最深刻就係交代耶穌有妻子嗰幕，個個演員都好稱職。套戲同本書相反，睇書就開頭好精采，結局麻麻。自己係基督教徒，但唔會以宗教角度去研究。」
張王幼倫：睇戲好緊湊
我睇過原著兩次，但睇戲同睇書心情好唔同，睇書可以慢慢思考，睇戲就好緊湊，電影交代嘅情節當然直接啲，我好欣賞選角，個個都演得好好，同埋套戲場景好仔細，覺得最震撼就係一開場館長被殺嗰幕。
林曉峰：難搞解碼學
我唔算虔誠嘅基督徒，入場都係當戲咁睇，不過對於耶穌同抹大拉的瑪利亞結婚仲有後呢個爭議嘅問題，睇完套戲都仍然係個謎。我覺得頭段喺羅浮宮部份好吸引，但後段講解碼就有啲唔清楚，始終觀眾唔識解碼學，對於嗰啲符號真係好唔明白。
