周杰倫同侯佩岑分咗手？傳出呢個消息嘅起因係啱啱生完BB嘅台灣主播陶晶瑩（陶子），喺自己嘅blog度寫話「他和她早已分手」，雖然冇開名講究竟邊個同邊個分手，但外界就聯想到話陶子寫嘅「她」就係同佢一齊主持《桃色蛋白質》嘅侯佩岑。
陶子之後又寫咗一篇文章，叫大家唔好對號入座，但又冇否認講嘅唔係周杰倫同侯佩岑，加上又有傳侯主播所屬嘅電視台高層，同人講話侯佩岑同周杰倫感情轉淡，重話𠵱家最頭痛嘅，係點樣製造畀佢哋由情人變朋友嘅下台階，希望做得靚靚哋，唔希望俾人話有第三者，搞到滿城風雨。
分隔兩地
近嚟周杰倫喺內地拍緊張藝謀嘅《滿城盡帶黃金甲》，一月嗰陣佢同侯主播都仲好好，唔通一排冇見，佢哋嘅感情就受唔住考驗？