國際物業顧問仲量聯行幾日前先講完澳門樓市，噚日又發表報告，繼續唱好，睇嚟當地樓市真係好有前景。
仲記話有迹象顯示，用家需求增加，當中以賭場嘅年輕員工需求特別強勁，而賭場或酒店集團嘅外籍管理人員，傾向承租高檔住宅，中檔住宅就最受中層管理員歡迎。今年第一季，澳門樓價升咗1%，高級住宅租金就升1.4%。
其實，仲記兩篇報告都有共通點，就係話賭場效應，將吸納大部份住宅新供應，令樓市向好。
另外，利嘉閣高級營業經理林志光話，喱半月住宅最熱賣嘅係筷子基區，成交量佔澳門半島整體三成，比上月同期就多十個百分點，因為區內有多間大型連鎖店開業，加上政府又籌備起食街，令到區內物業升值潛力大增。預期未來3個月，樓價會升10至15%。