外圍美股大散，淡友得勢不饒人，港股甫開即裂口大跌近400點，全日無力反彈，最惡劣之時，恒指曾大跌438點，收市16266，跌349點，成交376億元。期指跌310點，收16212，低水54點，大藍籌大多已除息，期指仍然低水，反映市場看淡者眾。
對沖基金造市，衝破16000大關後，可以好快就上升千多點，但掉頭造落，跌勢亦一樣可以好急，轉眼又可以唔見千多點，上落有千幾點，佢哋造好造淡，已經夠晒水位轉身，家吓恒指落到萬六點水平，已有一守之力。
中資股亦大跌，H指險守7000大關，收7032，跌2.6%，但個別好似國壽（2628）、建行（939）同鞍鋼（347）等，個勢仍算好強。國壽升到呢個水平，撞到大跌市，都只係回落0.25元，成交13億元，獲利回吐壓力雖大，但接貨者手瓜亦好硬。國壽一直都傳會有策略性投資者入股，看來樓梯已響，好事近矣。
基金揸重貨
鞍鋼噚日除息，收6.85元，僅微跌1個位，成交380多萬股，沽壓唔算大。踏入06年，鋼鐵業經營環境好轉，鋼價由低位回升，而鞍鋼收購母公司資產後，業績亦會出現高增長，加上鞍鋼已完成股改，市值超過400億元，有條件成為恒指新貴，多個因素都對鞍鋼有利；現時股價由高位已回落頗多，正可趁低吸納。
05年（12月年結），鞍鋼營業額264億元（人民幣．下同），升14%；盈利21.17億元，升17.8%；每股盈利0.715元，派末期息0.36元。去年共生產鋼材604.7萬噸，升8.87%。
今年初完成收購，並合併報表，首季淨利潤11億元，升82.0%，期內主營業務120.6億元，升75.7%。由於收購後產業鏈完整，整體盈利能力增強，期內毛利率19.31%，比前一報告期提升4.79個百分點。
鞍鋼預計，06年合併盈利，不會少於61.28億元，折算每股盈利超過1港元，以PE8倍計，股價已可重上8元水平。另外，鞍鋼會將盈利半數用作派息，即每股派0.50元，息率有7厘，好吸引。基金睇好鞍鋼，揸重貨，前列7大基金的持股量，已佔H股約45%。
郭兆誠