八方噚日落到立法會，硬係覺得爭咁啲嘢，係咩呢？睇嚟睇去原來係爭咗長毛。每次有答問大會，長毛梗係有啲出位搞作餘興吓，但佢噚日竟然冇出席，唔通玩缺席抗議？定係無情情俾國安拉咗，費事佢喺會上搞事？
查實長毛𠵱家身處佢最愛嘅德國，開緊一個關於人權嘅研討會，下星期三先返香港。有人話佢去咗睇波都係錯嘅，事關世界盃下個月先開鑼，唔通長毛真係等到嗰時咩。
如果有長毛喺度，煲呔可能就冇咁招積，因為長毛一定起身插嘴。好似馬丁話如果新政府總部起喺東南九龍，電費可以慳啲，煲呔即刻食住上，話好開心聽到民主黨會支持民建聯嘅建議，搞到全場笑爆肚。到後來煲呔雖然自嘲只貼中一題「親疏有別」，但一講就水蛇春咁長，聽到人瞌眼瞓；最離譜係佢竟然話長毛係「工聯會」，完全政治唔正確，點做政治家呀？
傳真︰2623-9278
電郵︰[email protected]