陳日君樞機喺梵蒂岡參加擢陞禮，接受教宗祝福嘅過程全球直播，都算係香港人光榮，但原來陳樞機背後都有難以啟齒嘅秘密，最新一期《公教報》就獨家披露咗呢個故事。
話說呢啲咁重要嘅宗教儀式，閒閒哋要搞兩、三粒鐘，加上要提早入場，結束後又要同教友打招呼，差不多半日時間，諸位樞機都有番咁上下年紀，該報坦言「年紀大、機器壞」，佢哋幾個鐘頭冇得去廁所，咪好慘？
既然有人關心呢個問題，陳樞機亦唔介意將「忍術」心得公開，原來儀式前一晚，佢已經唔飲水，免得翌日要頻頻去廁所，仲話平時聽告解，都唔可以隨便行開，一忍就要兩個鐘頭，所謂日子有功，難怪陳樞機咁忍得。
傳真︰2623-9278
電郵︰[email protected]