證監會分拆主席嘅法例仲未喺立法會通過，但證監高層已走得七七八八，上星期三主管法規執行部嘅執行董事李顯能最後一日返工，下星期四就輪到營運總裁兼企業融資部執行董事歐陽長恩拜拜，加埋韋奕禮升做主席後，佢原本嘅市場監察部執行董事個位亦懸空半年有多，即係有三大部門群龍無首，只剩番中介團體及投資產品部有個張灼華撐住，唔通喺證監真係咁難撈？
華華噚日講過證監高層人工，睇真啲本年報，原來有講主席人工。前主席沈聯濤固定年薪係675萬元，連埋花紅最多有708.75萬元，但佢任內主動放棄花紅，而佢舊年嘅薪酬就有620.2萬元。至於現主席韋奕禮基本年薪有635萬元，較前任少5.9%，花紅上限則一樣，而佢10月至4月任職主席期間，支取薪酬320萬元，連同之前做咗4個月執董嘅164.8萬元，合計484.8萬元。