今日孫柏文睇到一段新聞令我好妒忌，因為如果我都可以諗到呢條橋，我又可以話自己勁，話隻金手指醒，不過𠵱家俾人捷足先登，所以就同大家分享，歌頌同鼓勵吓啲咁有創意嘅人。其實，呢條令我好妒忌嘅橋，經過自我檢討之後，我發覺其實可以從兩段好似係無關嘅新聞分析，啓發出來。今日，就考吓大家，睇吓你哋可唔可以，單憑睇呢兩段好似無關嘅新聞嘅分析，諗得出今日令我好妒忌嘅橋。
首先第一段新聞，係孫柏文兩個禮拜前曾經講過，關於歐盟某高官話大陸有人複製已經絕版嘅法拉利跑車，證據就係，有一幅喺大陸影到嗰部車嘅相。咁呢位高官就指住幅相，指定動作咁大喊：「翻版呀！大陸翻版呀！」當時，我隻金手指篤出嚟嘅分析係，如果部車只係貌似法拉利，不過性能上差好多，呢啲翻版係唔吸引到咁嚴厲嘅批評。
所以當時我都有代表大陸汽車業，多謝呢位歐盟反盜版高官，因為就連佢都鬧大陸汽車業嘅時候，大家仲唔信大陸真係可以做一部性能比美法拉利嘅超級跑車咩？所以故事教訓就係就算翻版貨充斥嘅大陸，如果你要做翻版，都要用心去做。就算始終都係翻版，只要有用過心去做，都會有啲好似歐盟嘅高官會賞識。
考驗天主教徒
第二段新聞，就係講關於呢期全球熱話嘅荷李活巨片《達文西密碼》（TheDaVinciCode）。呢齣電影裏面，有講耶穌同抹大拉嘅結婚，又講佢哋有下一代。自然有人話呢齣電影褻瀆基督信仰，亦都令到有一啲比較活躍嘅天主教信徒，組織各種抗議活動，例如要求禁映、搞絕食告電影公司失實、要求電影加插聲明、派人入社區解釋、播放反駁《達文西密碼》不實內容嘅短片等等。
畀人感覺，係愈搞抗議活動就愈係中堅嘅天主教徒。搞到啲抗議活動，好似《聖經》中查明信徒係堅定係流嘅考驗（shibboleth）。只要你肯搞抗議活動，世界輿論就會覺得你就係一個不折不扣、如假包換嘅天主教徒。
搞到雞毛鴨血
好勒，講完呢兩件新聞之後，大家度唔度到今日令孫柏文好妒忌嘅嗰一條橋啊？哈，哈！如果大家都即刻諗到條橋，奉獻畀中國天主教愛國會，叫佢哋呼籲信徒，全面抵制《達文西密碼》，去「證明」佢哋係一個不折不扣、如假包換嘅天主教組織，我就會話你哋傻傻哋。繼而會問你哋究竟有冇睇《金手指》？咁低層次嘅打壓、抗議活動都夠膽同你偶像我，孫柏文講？
中國天主教愛國會，如果真係有誠意去打壓《達文西密碼》，佢哋就應該同「愛國」嘅黑社會合作，瘋狂咁去製造《達文西密碼》嘅翻版DVD。翻版DVD泛濫市場，咁中國天主教愛國會，仲唔成功搞到「褻瀆基督」嘅電影公司雞毛鴨血？仲唔成功「證明」佢哋不單止係一個不折不扣嘅天主教組織，仲可能比梵蒂岡天主教更加「天主教」？可能到時，中國天主教愛國會喺啲比較激進嘅天主教徒心目中，就會好似拉登喺啲比較激進嘅回教徒心目中嘅地位一模一樣！
孫柏文