華華噚日無論去咩event，見到咩人，大家都循例咁，一定問一個問題，唔係睇唔睇《達文西密碼》，而係有冇攞表抽中行！好似去到中移動個AGM，大家都要問吓王總建宙呢條問題。你估王總點答？佢好決絕咁話「冇」，但補充話絕對唔係對中行呢間銀行冇信心，而係因為佢從來唔買股票！叫大家唔好亂諗，以為佢唔畀面。
講開王總，其實佢係幾個中資電訊股領導裏面，華華比較鍾意嘅一個，唔好誤會，絕對唔係因為佢比較靚仔（事實真係同靚仔冇關），而係佢講說話比較肯定，唔惡得嚟又好有威嚴，帶大家遊花園得嚟又算唔多廢話。好似噚日有人問佢，聽聞祖國重組電訊業，佢會調去做信產部部長，王總話：「傳聞是沒有根據的謠言，不要去相信」，多句都無，但大家又可以好肯定咁交到差，唔似得聯通阿小兵哥咁，一味大大聲，得勞氣兩個字。
任總並冇買屋
講完王總，要補番一筆，幫任總任志剛澄清一吓。事關華華噚日寫佢喺夏威夷買咗好貴嘅屋，金管局噚日來電，話問過任總，佢並冇買屋。既然任總咁講，冇理由唔信佢，一定係我哋搞錯，真係唔好意思喇。
讀者如有任何意見或報料，歡迎發送電郵至
[email protected]。
李華華