猶記起開會討論這題目時，一位女同事特別激動：「咩話？20歲仔有6百萬?!我最憎人買股票！呢啲人賺咁多錢一定好樣衰、一定無女朋友、生活枯燥、唔識講嘢……」再問佢兩句原來佢「買親都蝕錢」，難怪！
股市上萬七點、中國銀行招股，報紙周刊幾乎期期係封面故事。股市熱，但後生仔/大學生並無「憎人富貴」，一於齊齊加入股場，不過一眾個案，人人投資策略都唔同，人人都話賺緊錢，唔通真係已經全民皆股？
記者：曾冠輝
攝影：楊錦文、陳盛臣
個案１少年股神：用10年做百萬富翁
Ivan，剛畢業於樹仁學院會計系、股齡4年、股壇偶像：林森池；投資取向：長線投資，金融股
Ivan才20出頭，已坐擁600萬身家，從前短炒小作，今天轉作長線投資，成績驕人。但原來Ivan身邊都有不少朋友於股市損失慘重，朋友見Ivan戰績好，紛紛將餘下資金轉交他全權處理：「𠵱家我手上可處理嘅資金大約有3千6百萬，當中有6百萬係我自己嘅。」嘩，「錢搵錢」當然容易，年輕人家當不多，又可以怎辦呢？佢話要做百萬富翁好容易，但要理財有道，個個月儲錢買優質股，需時10年：「假設有5萬蚊儲蓄，用嚟買晒金融、銀行股，因呢啲股每年平均回報率超過15%，之後每月儲3千蚊再買，10年後身家一定可以過百萬」。
「唔想入金融界！」
Ivan投資獨具心得，平時一定很多朋友向他「攞貼士」：「好多朋友有問，不過都唔會畀，因為𠵱家考慮嘅因素係咁啫，遲啲就唔一樣，我又唔可以一直跟進，萬一真係蝕咗賴我點算？」說的也是，始終股市瞬息萬變。那剛畢業的他是否準備入金融界呢？「唔……𠵱家都諗緊自己嘅去向，不過自己唔想入金融界，因為比較少好嘅條件同職位，我想從事管理行業多啲！」
抽唔抽中行？
不說不知，原來Ivan從來不抽新股，甚至連上市少於2年的股他也不買：「新股唔一定賺，相反新股缺乏可供參考嘅數據，唔足以評定係唔係值得買」，不過，準備招股的中行（中國銀行）有機會成為Ivan首次認購的新股：「來年計劃將國內金融股加入我嘅投資組合中，考慮緊選擇中銀、交銀、建行定係國壽，不過中行抽到嘅數量唔多，之後我可能會喺市場吸納長揸。」
個案２科網熱慘敗今年翻身
Jack，中文大學經濟學系二年級；股齡：7年；股壇偶像：TonyMeasor（東尼）；投資取向：長線投資、國內A股
Jack才22歲，屈指一算99年的他還未滿18歲，已開始炒股票？「當年市場炒賣氣氛熾熱，自己對股市又有啲興趣，於是主動說服屋企人用佢哋嘅戶口同錢炒股票」，當時Jack見國內對電腦的需求龐大，第一隻想購入的股票便是聯想，但最終還是選了較穩定的藍籌股九倉集團作試金石。
科網熱誤信名牌
99、00年正值科網股熱潮，Jack又有否觸礁呢？「嗰次都輸得幾慘，當時見李澤楷收購香港電訊呢個神話，覺得電訊盈科好有前景，於是喺$24蚊入咗貨。後來科網潮爆破，電盈由$24跌到得$10，諗住唔理佢等佢升番，點知又跌到得$5蚊，覺得無乜希望升回原位，惟有忍痛放咗，埋單輸咗幾萬蚊。」
911再入市
一次沉重教訓，不但是金錢上的損失，還受到家人埋怨，但Jack並沒有從此遠離股市，相反更積極看書看資料研究股市，911事件終於觸發他再度入市：「本來都沉寂咗一排，突然美國發生911事件，覺得呢個正是入市好時機，於是我就將當時自己儲嘅剪報拎畀屋企人睇，又仔細分析畀佢哋知，終於令佢哋對我重拾信心，畀錢我再入市。」這次入市，Jack經過仔細分析才決定，終於有所「斬獲」，財富增值數倍，今天手上屬於自己的股票市值約50萬。
抽唔抽中行？
「考慮緊，回報似乎比較低，未必抽。」
個案３炒輪賺錢買錶戴
Jeff，中文大學經濟學系畢業；現職：銀行從業員；股齡：3個月；投資取向：短炒衍生工具，中線股票
Jeff買賣股票的經驗不多，但在同事的影響下已嚐「炒輪」經驗：「第1次係買建行嘅窩輪，睇住個價喺兩星期內由$0.6升到$1.1，當時個心十五十六，唔知放唔放好，不過諗真又想賺多啲，最終都係唔放，結果個價開始跌，個心開始怯就嗱嗱臨放咗，好彩都賺少少，呢次都叫驚險啦！」
買窩輪以小博大
Jeff基於以小博大的心態買窩輪，他認為年輕人資金不多，窩輪是個短時間內賺錢的工具。Jeff衣着光鮮，靠炒股賺來的呢？「部份啦！好似隻錶同部iPod就係賺番嚟，兩樣加埋約$5,000蚊，賺到錢當然要獎勵吓自己啦，使埋下次再賺番。」
抽唔抽中行？
「唔抽，從來唔信新股神話。」
個案4股齡3個月專吼新股
May，浸會大學繙譯系二年級；股齡：3個月；投資取向：低風險，認購新股；賺錢經驗：認購到金鷹商貿（3308）轉手$1,000（回報率3成）、認購大連港（2880）賺$3,000多（回報率6成）
兩次皆有「斬獲」的經驗過後，May自言只認購新股而未敢入市購買現貨：「10隻IPO（公開認購之新股）9隻賺，見佢超額認購就知正式上市後實升，風險比較低；股市現貨都有諗過買交銀（交通銀行），但始終覺得自己對股市認識未夠深，唔敢買住。」
自學投資偶像巴菲特
新股不是時時有，為求入市，May買書上網自行研究股票市場：「我都有買啲關於股票市場嘅工具書學睇個市同揀股票，得閒又上港交所網頁睇個指數、股價同成交額，試吓分析市場走勢……自己𠵱家未有資格買股票，等我再認識多啲先會買。」訪問期間May帶來一些工具書，從中她找到了學習偶像：「美國股神巴菲特講得好有道理，佢主張以公司價值分析隻股值唔值得買，唔係一味跟熱潮。」
抽唔抽中行？
「決定唔抽，市道轉壞似乎有風險。」
曾淵倉：學買股票愈早愈好
曾淵倉是城市大學工商管理學系講師，亦是財經版專欄作家、股壇的「老行尊」，過來人看一班股壇「口靚仔」又會怎樣？「我覺得後生仔愈早識得理財愈好，開始時唔好玩真錢住，可以上網玩吓模擬嘅遊戲先，到出嚟做嘢儲到錢先開始投資。年輕人又可以大膽進取啲，由股票、窩輪到孖展都可以，只要唔好輸突就得。」剛出來打工的資金不多又應該如何開始呢？「錢唔多就咪買，費事連手續費都蝕埋，起碼儲夠10萬蚊先好買」，講到投資工具，曾淵倉話年輕人不妨樣樣都試吓。咁如果後生仔抽中行佢點睇？「基本上抽新股唔算係投資。不過𠵱家個市的確係逢新股都升，中行不妨抽吓，都係當抽獎咁啫！」
