幾十萬銀一層樓，你會要求啲咩？唔係講緊居屋或者出售公屋，係私人樓，仲要係單幢嗰隻，三四百呎左右，眼鏡房加長廳，附送蚊型廚廁同窗台，有冇吸引力？
物業係富澤大廈，喺香港仔田灣，話晒叫做市區，樓齡唔太舊，14年左右，附近有舖頭、巴士站，92.8萬元，369呎單位，有冇得諗？或者大家會話，成2500蚊呎，一般啦。不過層樓過去半年，轉過手3次，對上兩次都各賺一成幾，兩個炒家都幾乎齋袋十幾萬，咁係咪有番啲興趣呢？
中原梁國輝話，呢個低層A室，最初個業主，喺92年以約50萬元一手購入，舊年11月以70萬元賣咗畀個炒家，升值四成。今年3月，以82萬元由另一炒家接手，4個月升咗17%。早兩日有兩個後生仔，就明畀10.8萬元個炒家使，用92.8萬買入自住。炒樓無分貴賤，最緊要有人受。