夏日炎炎，各位靚女們最怕熱，大汗淋漓不特止，分分鐘整溶個靚妝，同腋下一笪汗迹有礙觀瞻。唔想變「大汗」靚女，就要好似唐寧咁醒目，出盡法寶消暑，食雪糕、歎冷氣、去游水，仲有就係着住清涼嘅夏裝，食番啲涼浸浸消暑菜式，食完唔單止由頭涼到落腳，男士們嘅眼睛都可以享受冰淇淋。
記者︰方綺君
攝影︰陳偉強
服裝︰www.izzue.com
凍冰冰新派上海菜
夜上海一向結合江蘇省、浙江省及上海三地菜式的優點，創製新派上海菜。傳統上海菜式如獅子頭、小籠包等，一向予人多油和調味重的感覺，但印尼華僑唐寧對味濃的上海菜一向情有獨鍾︰「我好鍾意食獅子頭㗎！」未上菜已經興致勃勃。不過現在健康飲食盛行，上海菜都要迎合潮流少油少調味，而且味道太濃的菜式會令汗水味道重，在大熱天時變「臭狐」就唔好。
今次的冷盤，清新口感冰涼，尤其十八鮮和龍華寺素鴨。Leila話眾多涼浸浸的冷盤中，至鍾意龍華寺素鴨同醬牛肉，因為同樣煙韌有𡁻口︰「秘製滷水的醬牛肉凍食都好香，食完真係涼浸浸。」
醬牛肉$50
大廚以花椒、八角自製滷水汁慢火煮牛肉2小時，以為滷味熱食才好味，估不到冷食一樣有驚喜！
龍華寺素鴨$48
由夜上海的上海分店空運到港，以腐皮製成卷狀，用煙熏的方法烹調。
十八鮮$48
以多種當造蔬菜切絲，其中有紅椒、黃椒、烏笋、木耳等，配少許麻油、鹽、糖等，帶出蔬菜絲的甜味。
夜上海（23763322）
地址：尖沙嘴廣東道馬可孛羅香港酒店6樓
營業時間︰11:30am-2:30pm，6:00pm-12:00mn
米紙包住減油膩啱夏日
不一定要食冷盤有種切切實實涼的感覺先可以在炎夏消暑，將材料配上香草再捲成生菜包，都是大熱天的時興食法。近期大Hit的RicePaper，主打法式越南菜，今次Leila試食的菜式皆是新出品，部份菜式要配合汁料和香草，以生菜或米紙包裹一齊食。捲成生菜包的食法，可以減少油膩感，由於拌以蔬菜，所以食過量都不會有過飽的感覺。Leila話：「夏天太熱都會無胃口食嘢，包生菜食感覺真係爽啲，無咁油膩。」
燴牛腿．辣蒜香肉汁$60
將牛腿燜腍再煎香，汁料主要材料有韓國辣椒醬和麵豉，再加入少許綠芥末帶出攻鼻的刺激效果，食時要以生菜捲成生菜包。
鮮蝦串濱海$65
其中一個梅師傅到越南取靈感的美食，濱海是越南一種地道的麵食，本身無味，所以要配上葱油、炸蒜和乾葱，拌以特製的越南地道醬汁，有青檸、魚露和椰糖等。
柚香龍蝦嫩雞沙律$125
新鮮波士頓龍蝦肉、新鮮雞胸肉、西施柚、西柚創新的材料配搭，吃時拌以加入檸檬汁和橄欖油的特製芥末汁，醒神開胃。
RicePaper（31517801）
地址：尖沙嘴海港城港威商場3樓3319號店
營業時間︰11:30am-11:00pm
