昨日本欄講到一九六六年世界盃英格蘭隊一位奪標英雄阿倫波爾，為籌錢買屋，將世界盃獎牌賣咗，得十四萬鎊。之後睇到新聞，德國球星波歷克加盟車路士，周薪高達十三萬鎊，相信曾經效力阿仙奴，同樣係打中場嘅阿倫波爾，會好有感慨。呢個故事教訓我哋，通貨膨脹十分可怕，資產價格膨脹更加可怕。今日明星球員如波歷克、林柏特，昔日明星如阿倫波爾、卜比查爾頓等等，當然係球會「資產」啦。我哋如果今日退休，四十年後仍然在生嘅話，今日即使擁有退休金一千萬元，好似好多，但如果放在銀行收利息，唔買番一啲資產嘅話，四十年後嘅一千萬元（假使仍然未用過），可能乜都買唔到。阿倫波爾喺四十年前，如果買一間西班牙海邊別墅兼夾一間倫敦大屋，當然有錢有資格，但係當年唔買，今日就相對貧窮咯。各位老友，要識得理財，識得適當投資呀，如果今日嘅波歷克只係識使錢，四十年後話唔定輪到佢出賣世界盃獎牌都似──不過諗深一層，以德國隊嘅實力，波歷克今屆、下屆，都唔似會贏到世界盃獎牌。
體育明星嘅職業壽命比較短，頂多有二十年，黃金時代只有十年（二十至三十歲），識賺錢唔識投資或委託理財專家/私人銀行家代為投資嘅話，好可能晚景淒涼，染上毒癮賭癮嘅更加弊。我哋冇資格一個星期賺十三萬英鎊（約一百九十萬港元），其實連賺零頭都冇資格，只好死捱死慳死抵啦。慳番嚟嘅錢，唔投資又唔掂噃，攬住啲現金，遲早畀通脹食晒，所以無論你係教師、藝術家、稿匠、大作家、警察還是總經理、社長等等各式人士，都要學吓理財投資知識，唔好畀人亂咁點。
去年退休嘅美麗祖母A喺退休之時，叫左丁山教佢每日上網買賣股票，一來過日辰，二來搵番啲使用。左丁山唔敢教，怕佢受唔住風險刺激也。六十歲後先至學炒股票，遲啲噃，退休金容乜易唔夠交學費？讀完大學，搵到第一份工，或者二十五歲生日之後，就要學投資嘞！