喺全球引起極大迴響嘅小說《達文西密碼》，電影版啱啱上畫，為唔少人帶嚟商機，新地嘅銅鑼灣世貿中心商場，用近百萬搞《達文西密碼》終極之謎展覽，新地代理租務部副總經理鍾秀蓮表示，過去兩個禮拜，商場人流量勁升四成，營業額多咗15至20%。佢估計5月份生意額可達4000萬。
而九龍倉嘅尖沙嘴海港城商場，就搵嚟喺第15屆國際蕭邦鋼琴大賽贏到第6名，同獲得2003年SEILER國際鋼琴大賽冠軍嘅李嘉齡，今個禮拜日喺商場公開表演，吸引一眾音樂發燒友到場。
講開商場，順便提吓嘉里嘅九龍灣MegaBox，最近全力贊助香港設計中心專為商場而搞嘅「制服設計」比賽，勝出作品會成為商場員工制服。