沙士為人類帶來嘅傷痛隨住時間逐漸減褪，家吓港人最驚嘅係禽流感。世衞噚日出版咗一本名為《SARS：Howaglobalepidemicwasstopped》嘅書，記低抗疫經驗，以後抗禽流感都有啲參考作用。
呢本書賣25蚊美金（195港元），各大書局有售。本書講當年祖國嘅疫情點樣紙包唔住火，同埋各地點樣抗疫，仲記錄咗一啲關鍵場面，例如疫情爆發初期，世衞西太平洋地域事務局長尾身茂，同當時仲未俾人燉冬菇嘅中國衞生部部長張文康，喺香港一間酒店房密會，尾身茂想知大陸真實情況，但最後套料失敗。
尾身茂噚日同八方講，自己同張文康係識咗好多年嘅朋友，呢世人都未試過氣氛咁緊張嘅會面。佢希望呢本書令後世知道，可唔可以成功抗疫，國家透明度真係好重要。
傳真︰2623-9278
電郵︰[email protected]