臨近暑假，新款DC相繼出籠，好多新機落場冇耐已出現減價情況。早幾日巡舖時，筆者眼利見到RICOH部R30，由$2,680減到$1,880，話晒部機今年年初先出，加上510萬像素、28mm廣角、5.7倍光學變焦等不俗規格，雖則機身厚咗少少，但廣角同遠攝強喎！於是入舖問Sales點解咁筍，原來係益會員，之但係，登記做會員唔使錢，平時買機買配件都有優惠，登一登記慳八嚿水，諗落有着數。另外，筆者收風CASIO有部過千萬像素卡片形DC剛落場，又八卦問吓究竟有無人買，答案係問嘅人多，買嘅人係零！咁又係，廣告又唔覺有，無宣傳邊度有人知吖！
售賣點：[email protected]（27811780）
RR630冧至$1,280
除咗R30，今個星期仲有部學生精選平價DC－－CaplioRR630；600萬像素、3倍光學變焦、2"芒、行筆芯電池，規格都算相當OK，而且佢仲內置有Movie錄影，同光圈、快門先決影相功能，真係好過好多腦場WebCam仔多多聲，機價由$1,880直線下滑到$1,280，真係幾勁吓！據知係因為攬大貨所以先做到咁平價，所以大可買得放心！
另外，出機時如果加$100，仲可以出多張512MBSD卡喪影㖭！吓？點解唔送埋卡？平時出機又送卡又送袋，原因係你買嗰部機仲有水位走囉！冇嘢送唯一原因，係個機價已「鍊」盡！呢啲先至係真底價，知冇！
記者：招佩珊、朱崇德
售賣點：中原電器（27707608）